Skip to main content
bannerra

Bideoteka

Bideotekan bilatu
bideoaren irudia
Talde historikoek zulo nabarmena utzi dute Errusiako mundialean

2018-06-22

Italia eta Holanda dira aurtengo Munduko kopan falta diren talde nabarmenenak, baina ez bakarrak. Beñat Zarrabeitiak falta diren herrialdeak dakartza gaurko pilulara.

bideoaren irudia
Presoen abokatuek salbuespen egoeraren amaiera eskatu dute

2018-06-22

Euskal preso politikoen zigor betetzeaz arduaratzen diren abokatuak salbuespen politiken iraunkortzea salatu dute. ETAk ekintza armatua bukatu eta zazpi urtera eta jadanik armagabetua, presoen egoera bere horretan jarraitzen du.

bideoaren irudia
Bea Ilardiarena eta Jone Goirizelaia izango dira Bizkaiko eta Bilboko EHBilduko zerrendaburuak

2018-06-22

Azken hilabetean Bizkaiko EHbilduk Barne hauteskundeak egin ditu  Bizkaiko foru hauteskundetarako  eta bilboko udalerako zerrendaburuak hautatzeko. Hautagaien artean  Bizkaitik Arantza Urkaregi eta Bea Ilardiarena zeuden eta Bilbotik Jone Goirizelaia eta Joana Macoartu.

Bilkideen gehingo baten botoei esker  Jone Gorizelaia eta Bea Ilardiarena izan dira hautatuak zerrendaburuak izateko.

Jone Goirizelaia prest agertu da Bilboko auzoko bizilagunak entzuteko beraien kezkak udalera eramateko. Oso bestelako Bizkaia bat marraztu nahi du Bea Ilardiarenak , proiektu ezkertiar, soberanista eta batez ere feminista aurrera eramanez.  Pertsonak erdigunean ipiniz.

bideoaren irudia
Zentsura ikertzeko lanagatik omendu dute Joan Mari Torrealdai

2018-06-22

Lehen eguna «Iberiar penintsulako naziotasunetako kulturetako zentsura» aztertzeari eskainiko diote; hau da, katalanez, galegoz, gazteleraz eta euskaraz sortzen duten esparruetako kasuak izango dituzte hizpide Euskal Herriko eta nazioarteko 25 ikerlarik. Bigarrena, berriz, Joan Mari Torrealdairi omenaldia eginez hasi dute. Eta nabarmendu nahi izan dituzte euskal liburugintzari buruz egin dituen azterketa soziologikoak eta frankistari buruzko bere ikerketa lanak. Kongresuaren antolatzaileen hitzetan, Torrealdaik ikertu du sakonen euskal kulturgintzan izaniko zentsuraren eragina.

Haren ondoren hitza hartu duten zazpi adituek euskal kulturgintza eta zentsura izan dituzte aztergai, hainbat arlori erreparatuta. Jardunaldien osagarri, berriz, Debekatuak baina ez ahaztuak erakusketa ikusgai dago ostegunetik Koldo Mitxelena kulturunean. Ismael Manterolak eta Alex Gurrutxagak egin dituzte komisario lanak, eta Espainiako Estatuaren zentsura instituzionalak euskal kulturgintzan izan duen eraginaren argazki bat eskaintzea du xede.

bideoaren irudia
Iruñeko talde bortxaketaren egileak, fidantzapean libre

2018-06-21

Gogora ekarriko dugu, bere garaian ere, jasotako zigorrak berealdiko ezinegona sortu zuela kalean, besetak beste, delitua abusu mailara jaitsi eta sexu erasorik ez zela gertatu ebatzi zutelako. Alegia, epaileen arabera, ez zen indarkeriarik egon bost gizon helduk 18 urteko adingabe bati egindako erasoa, nahiz eta aitortu zuten sexu harremanak ez direla adostuak izan eta bost zigortuek beren nagusitasuna baliatu zutela. Areago, epaileetako batek absoluzioa eskatu zuen, deliturik ere ez zegoelakoan.

Ebazpen hari helegitea jarria diote alde guztiek: akusazioek zigor handiagoa eskatu dute, sexu erasoa izan zelakoan, eta defentsek absoluzioa nahi dute. Sententzia irmoa izan arte, beraz, libre geratuko dira bost zigortuak, 6.000 euroko bermearekin.

bideoaren irudia
BERRIAk hamabosgarren urteurrena ospatu du

2018-06-21
Duela hamabost urte kaleratu zen BERRIAren lehen azala, eta urteurrena ospatzeko ekitaldi bat antolatu zuten atzo Andoaingo Martin Ugalde kultur parkean. Egunkaria egiten dutenak izan ziren protagonista eta euskarazko kazetaritza babesteko beharra aldarrikatu zuten dozenaka zaleen aurrean. Egungo langileak, langile ohiak eta irakurleak bildu ziren BERRIAk urteotan egindako lanak, ahaleginak eta ekarpenak nabarmentzeko. Hamabost urteko bidean zehar izandako aldaketez eta egindako lanaz hitz egin zuen Martxelo Otamendik. Egunkariaren helburua Euskal Herriko eta munduko gertakizunen berri profesionaltasunez ematea dela adierazi zuen, izan dituzten akatsetatik ikasten saiatu direla baieztatuz. Digitalizazioaren eta krisi ekonomikoaren eraginaz ere aritu zen BERRIAko zuzendaria. Egunkari bat egitea ariketa ezegonkorra bihurtu dela esan zuen, etorkizunean lana nola egingo den jakitea ezinezkoa bihurtu dela. Hala ere, euskara gainontzeko hizkuntzen parean jartzeko egindako esfortzua goraipatu zuen Otamendik. BERRIA Taldeko lehendakariak, Beatriz Zabalondok, iraganean bizitako egoera txarrei aurre egiten jakin dutela aipatu zuen. Herriak eskainitako indarra ere eskertu zuen, proiektua eusten laguntzeko gakoa izan dela baieztatuz. Komunitate horren bultzadari esker, inoiz baino irakurle gehiago ditu BERRIAk, baina diru sarrerarik ez dakar kontsumo horrek. Horregatik irakurleen laguntza eskatu du egunkariak, etorkizuna bermatzeko konpromiso ekonomikoa har dezaten. Erakunde publikoen laguntza ere oinarrizkoa dela gogorarazi zuen Zabalondok, arlo horretan aldaketarako premia dagoela eta denen artean elkarrekin lan egitea garrantzitsua dela adieraziz. Erakunde desberdinetako ordezkariek ere parte hartu zuten ekitaldian eta guztiek aitortu zuten hamabost urteetako ibilbidearen meritua, proiektuak etorkizuna duela baieztatuz. Bingen Zupiriak egunkariak euskarari egin dion ekarpena nabarmendu zuen, gaurkotasuna euskaraz ezagutzeko euskarri bihurtu dela adieraziz, eta euskal gizartean erreferente dela baieztatuz. Egunkariaren garrantzia ere nabarmendu zuen Dabid Anautek, EH Bilduren eskutik Nafarroako Parlamentuko legebiltzarkide denak, euskarak etorkizuna duen bitartean BERRIAk ere baduela ziurtatuz. Mertxe Mujikak euskaraz dagoen egunkari nazional bakarra dela gogorarazi zuen. AEK-ko koordinatzaile nagusiak egunkariak osasuntsu jarraituko duela eta euskara normalizatu bat BERRIA eskuetan izan gabe ez duela irudikatzen esan zuen. Egindako berrikuntzen eta egin beharrekoen errepasoa egin zen ekitaldian, eta Euskal Herriak euskarazko hedabideak behar dituela azaldu zen.Azken hamabost urtetan gizartea aldatu arren, behar hori bizirik dagoela eta BERRIAk Euskal Herritik eta Euskal Herriarentzat lanean jarraituko duela argi geratu zen.